கோப் குழுவில் வெளிப்பட்ட வெளிநாட்டு வேலைவாய்ப்புப் பணியகத்தின் செலவீனம்

இலங்கை வெளிநாட்டு வேலைவாய்ப்புப் பணியகம் பில்லியனுக்கும் மேற்பட்ட நிதி செலவீனம் – கோப் குழுவில் அதிர்ச்சி தகவல்

2024 ஆம் ஆண்டுக்கான வருடாந்த செயற்திட்டத்தில் சேர்க்கப்படாத இரண்டு திட்டங்களுக்கு எவ்வித திட்டமிடலுமின்றி, ரூ. 1 பில்லியனுக்கும் அதிகமான நிதியை இலங்கை வெளிநாட்டு வேலைவாய்ப்புப் பணியகம் பயன்படுத்தியுள்ளதாக அரசாங்கப் பொறுப்பு முயற்சிகள் பற்றிய குழு (கோப்) கூட்டத்தில் வெளிப்பட்டது.

63 மில்லியன் ரூபாவுக்கு ‘விகமனிக ஹரசர’ திட்டம்

தொழில் மற்றும் வெளிநாட்டு வேலைவாய்ப்பு அமைச்சினால், குடியகல்வு சங்கங்களின் 5,000 அங்கத்தவர்கள் பங்கேற்ற மாகாண மட்ட கூட்டங்களுக்கு ‘விகமனிக ஹரசர’ என்ற நிகழ்ச்சி நடத்த 63 மில்லியனுக்கும் அதிக நிதி பயன்படுத்தப்பட்டுள்ளது.

1,259 மில்லியனுக்கு ‘Glocal Fair’ திட்டம்

மேலும், வெளிநாட்டு வேலைவாய்ப்பு அமைச்சின் கீழ் உள்ள நிறுவனங்களின் சேவைகளை நாடு முழுவதும் பொதுமக்களுக்கு நேரடியாக வழங்கும் வகையில் Glocal Fair வேலைத்திட்டம் மேற்கொள்ளப்பட்டு, அதற்காக 1,259 மில்லியன் ரூபா செலவழிக்கப்பட்டது.

இவை, வருடாந்த செயல்திட்டத்தில் சேர்க்கப்படாததுடன், எந்த வகையான அமைச்சரவை அனுமதியும் பெறாத நிலையில் ஆரம்பிக்கப்பட்டுள்ளதாகவும், பின்னர் இடைநிலை ஒப்புதலுக்காக அமைச்சரவை பத்திரம் சமர்ப்பிக்கப்பட்டதாகவும் குழுத் தலைவர் வைத்தியர் நிஷாந்த சமரவீர தெரிவித்தார்.

2 மில்லியனுக்கு ஒதுக்கீடு – ஆனால் செலவு 1,259 மில்லியன்

இத்தகைய நிகழ்ச்சிகளுக்காக வெறும் 2 மில்லியன் ரூபா மட்டுமே வருடாந்த அரசாங்க நிதி ஒதுக்கீட்டில் இடம் பெற்றிருந்த போதிலும், அதைவிட அதிகமான 1,259 மில்லியன் ரூபா செலவழிக்கப்பட்டமை குறித்து குழுத் தலைவர் அதிகாரிகளை சுயவிமர்சனத்துக்கு அழைத்தார்.

விலைவாசி அதிகரிப்பு – ஒரே கூடம் இரு விலை!

Glocal Fair ஆரம்ப நிகழ்வில் பயன்படுத்தப்பட்ட வர்த்தகக் கூடம் ஒன்றுக்கு ஆரம்பத்தில் ரூ. 1.70 லட்சம் செலவாகியிருந்தாலும், பின்னர் அதே மாதிரியான கூடம் ரூ. 5 லட்சத்திற்கு கொள்வனவு செய்யப்பட்டமை குறித்து குழுவில் வினவப்பட்டது.

வினைத்திறனற்ற திட்டங்களில் நிதி வீணாக்கம்

திட்டமிடப்படாத மற்றும் ministerial approval இல்லாத வேலைத்திட்டங்களில் இந்த அளவிலான நிதி செலவீனம் செய்யப்பட்டது மிகவும் கவலைக்கிடமானது எனவும், இது குறித்த பதில்களை தர அதிகாரிகள் தவறியதாகவும் குழுத் தலைவர் குற்றம்சாட்டினார்.

100 மில்லியன் ரூபா பாக்கி – ‘ரடவிரு’ வீட்டு கடன் திட்டம் செயலாக்கம் இல்லை

மேலும், 2013 ஆம் ஆண்டு சமுர்த்தி அதிகாரசபையுடன் இணைந்து தொடங்கப்பட்ட ‘ரடவிரு’ வீட்டு கடன் திட்டம், 5 வருட ஒப்பந்தம் இருந்த போதும், முறையாக செயல்படுத்தப்படவில்லை. இதனால் இலங்கை வெளிநாட்டு வேலைவாய்ப்புப் பணியகத்திற்கு கிடைக்கவேண்டிய ரூ. 100 மில்லியன் இன்றுவரை கிடைக்கவில்லை. எனினும் சமுர்த்தி அதிகாரசபை இப்போது அந்தத் தொகையை வழங்க உடன்பட்டுள்ளதாக அதிகாரிகள் தெரிவித்தனர்.