ஐபோன் பயனர்களுக்கு வந்த சோக செய்தி – ஆப்பிளின் அதிரடி முடிவு

ஆப்பிள் (Apple) நிறுவனத்தின் தயாரிப்புகளுக்கு உலகளவில் எப்போதும் தனி மவுசு உண்டு. குறிப்பாக தங்களின் பழைய ஐபோன்களுக்கும் தொடர்ந்து புதிய மென்பொருள் (Software) அப்டேட்களை வழங்கி வாடிக்கையாளர்களைத் தக்கவைப்பது ஆப்பிள் நிறுவனத்தின் வழக்கம். ஆனால் தற்போது வெளியாகியுள்ள ஒரு முக்கிய அறிவிப்பு பழைய ஐபோன் பயனர்கள் மத்தியில் பெரும் ஏமாற்றத்தை ஏற்படுத்தியுள்ளது.

விரைவில் அறிமுகமாகவுள்ள ஆப்பிள் நிறுவனத்தின் புதிய iOS 27 அப்டேட், சந்தையில் பரவலாகப் பயன்படுத்தப்பட்டு வரும் சில பழைய ஐபோன் மாடல்களுக்கு வழங்கப்படாது என்பது அதிகாரப்பூர்வமாக உறுதியாகியுள்ளது.

ஆப்பிள் நிறுவனத்தின் தொழில்நுட்பத் தர மேம்பாடு மற்றும் புதிய பாதுகாப்பு அம்சங்களின் காரணமாக iPhone 11 சீரிஸ் (iPhone 11, 11 Pro, 11 Pro Max), iPhone SE (2nd Generation)ஆகிய மாடல்களுக்கு இனி புதிய அப்டேட்கள் கிடைக்காது.

இந்த ஐபோன்கள் உடனடியாகச் செயல்படுவதை நிறுத்தாது. ஆனால், ஆப்பிள் நிறுவனத்தின் புதிய அம்சங்கள், எமோஜிக்கள் மற்றும் மேம்படுத்தப்பட்ட பாதுகாப்பு வசதிகள் (Security Updates) இனி இந்த மாடல்களுக்குக் கிடைக்காது.

புதிய iOS 27 மென்பொருளானது அதிநவீன செயற்கை நுண்ணறிவு (Apple Intelligence) மற்றும் மேம்பட்ட பிராசஸர் திறனைக் கோருகிறது. iPhone 11 மாடல்கள் A13 Bionic சிப்செட் கொண்டு இயங்குபவை.

புதிய மென்பொருளின் பிரம்மாண்டமான கிராபிக்ஸ் மற்றும் பாதுகாப்புத் தேவைகளைக் கையாளும் திறன் இந்த பழைய சிப்களுக்கு இல்லை என்பதே இந்த மாற்றத்திற்குக் காரணம் எனத் தொழில்நுட்ப வல்லுநர்கள் தெரிவிக்கின்றனர்.

iPhone 11 மற்றும் iPhone SE (2nd Gen) ஆகிய மாடல்களுக்குப் பிறகு சந்தைக்கு வந்த iPhone 12 சீரிஸ் மற்றும் அதற்கடுத்த பிந்தைய புதிய மாடல்களுக்கு மட்டுமே இந்த iOS 27 அப்டேட் தடையின்றி கிடைக்கும் என ஆப்பிள் நிறுவனம் தெரிவித்துள்ளது.

கடந்த சில ஆண்டுகளாகவே தங்களின் பிரியமான போனாக iPhone 11-ஐப் பயன்படுத்தி வரும் லட்சக்கணக்கான நடுத்தர வர்க்கப் பயனர்களுக்கு இந்த அறிவிப்பு ஏமாற்றத்தை அளித்துள்ள போதிலும், புதிய மாடல்களுக்கு மாற வேண்டிய கட்டாயத்தை இது ஏற்படுத்தியுள்ளது.