சிங்கங்களின் சீற்றங்களால் அலறிய கங்காருகள் – சுப்பர் 8க்குள் நுழைந்த இலங்கை அணி

பல்லேகல சர்வதேச கிரிக்கெட் மைதானம் மைதானத்தில் இன்று (16) நடைபெற்ற ஐசிசி இருபதுக்கு 20 உலகக் கிண்ணம் தொடரின் 30-வது லீக் ஆட்டத்தில் இலங்கை கிரிக்கெட் அணி 8 விக்கெட்டுகள் வித்தியாசத்தில் ஆஸ்திரேலியா கிரிக்கெட் அணியை வீழ்த்தி முக்கிய வெற்றியைப் பதிவு செய்தது. இந்த வெற்றியுடன் இலங்கை அணி ‘சூப்பர் 8’ சுற்றுக்கான தகுதியை உத்தியோகபூர்வமாக உறுதி செய்துள்ளது.

நாணய சுழற்சியில் வென்ற இலங்கை அணி முதலில் பந்துவீச்சைத் தேர்வு செய்தது. அதன்படி முதலில் துடுப்பெடுத்தாடிய ஆஸ்திரேலியா அணி நிர்ணயிக்கப்பட்ட 20 ஓவர்களில் அனைத்து விக்கெட்டுகளையும் இழந்து 181 ஓட்டங்களைப் பெற்றது.

ஆஸ்திரேலிய அணிக்கு தொடக்கத்தில் வலுவான அடித்தளத்தை அமைத்துத் தந்தவர் ட்ராவிஸ் ஹெட்; அவர் 29 பந்துகளில் 56 ஓட்டங்கள் குவித்தார். அணித்தலைவர் மிட்செல் மார்ஷ் 27 பந்துகளில் 54 ஓட்டங்கள் விளாசி அணியை வலுப்படுத்தினார். முதல் விக்கெட்டுக்கு இவ்விருவரும் அமைத்த கூட்டாண்மை ஆஸ்திரேலியாவுக்கு நம்பிக்கையளித்தது.

எனினும், மத்திய ஓவர்களில் இலங்கைச் சுழற்பந்து வீச்சாளர்கள் கட்டுப்பாட்டை மீட்டனர். தொடர்ச்சியாக மத்திய வரிசை வீரர்கள் ஆட்டமிழந்ததால் 200 ஓட்டங்களை எட்டும் வாய்ப்பு ஆஸ்திரேலியாவுக்கு கைகூடவில்லை. ஜோஷ் இங்கிலிஸ் 27 ஓட்டங்கள் பெற்றார்.

பந்துவீச்சில் துஷான் ஹேமந்த 3 விக்கெட்டுகளையும், துஷ்மந்த சமீர 2 விக்கெட்டுகளையும் கைப்பற்றினர். மதீஷ பத்திரண 0.4 ஓவர்கள் மட்டுமே வீசிய நிலையில் காயம் காரணமாக மைதானத்தை விட்டு வெளியேறியது இலங்கை அணிக்கு ஒரு சற்றே பின்னடைவை ஏற்படுத்தியது.

182 என்ற வெற்றி இலக்கை நோக்கிப் பதிலளித்த இலங்கை அணி 18 ஓவர்கள் முடிவில் 2 விக்கெட்டுகள் மட்டுமே இழந்து 184 ஓட்டங்கள் குவித்து வெற்றியை எளிதில் பெற்றது.

தொடக்க வீரர் பெத்தும் நிஸ்ஸங்க அதிரடி ஆட்டம் காட்டி 52 பந்துகளில் 10 பவுண்டரிகள் மற்றும் 5 சிக்சர்களுடன் ஆட்டமிழக்காது 100 ஓட்டங்கள் குவித்து அணியின் வெற்றியை உறுதி செய்தார். அவருக்கு உறுதுணையாக குசல் மெந்திஸ் 51 ஓட்டங்கள் சேர்த்தார். இறுதியில் பவன் ரத்நாயக்க ஆட்டமிழக்காது 28 ஓட்டங்கள் பெற்று வெற்றியை நிறைவு செய்தார்.

இந்த வெற்றியின் மூலம் ‘குரூப் B’ பிரிவில் இருந்து இலங்கை அணி அடுத்த கட்டமான ‘சூப்பர் 8’ சுற்றுக்கு முன்னேறியுள்ளது.