இலங்கையில் தடை செய்யப்பட்ட அமைப்புகளின் பட்டியல் – புதிய வர்த்தமானி அறிவிப்பு

இலங்கையில் 15 அமைப்புகள், 217 நபர்கள் மீது தடை: பாதுகாப்பு அமைச்சின் புதுப்பிப்பு

இலங்கை அரசாங்கம் தடை செய்யப்பட்ட அமைப்புகள் மற்றும் நபர்களின் பட்டியலை புதுப்பித்து, அதற்கான புதிய வர்த்தமானி அறிவித்தலை வெளியிட்டுள்ளது.

இந்த அறிவித்தல், இலங்கை பாதுகாப்பு அமைச்சின் செயலாளர் சம்பத் துய்யகொந்தா மூலம் அதிகாரப்பூர்வமாக வெளியிடப்பட்டுள்ளது. இதில் 15 அமைப்புகள் மற்றும் 217 நபர்கள் பற்றிய விவரங்கள் இடம் பெற்றுள்ளன.

புதுப்பிக்கப்பட்ட பட்டியலில் தமிழீழ விடுதலைப் புலிகள் (LTTE), தமிழர் புனர்வாழ்வு அமைப்பு, தமிழர் ஒருங்கிணைப்புக் குழு, உலக தமிழர் இயக்கம், நாடு கடந்த தமிழீழ அரசு, உலக தமிழர் நிவாரண நிதியம், கனேடிய தமிழர் தேசிய அவை மற்றும் டி.வை.ஓ (தமிழ் இளைஞர் அமைப்பு) உள்ளிட்ட அமைப்புகள் பயங்கரவாத நடவடிக்கைகளுடன் தொடர்புடையதாக அறிவிக்கப்பட்டு, தடை செய்யப்பட்டுள்ளன.

மேலும், எக்சியூ என்ற தலைமையக குழு, தேசிய தௌஹித் ஜமாத், ஜமாதே மிலாதே இப்ராஹிம், விலயாத் அஸ் செயிலானி, டருள் ஆதர் அத்துபவியா, இலங்கை இஸ்லாமிய மாணவர் ஒன்றியம் மற்றும் சேவ் த பேர்ளஸ் ஆகிய அமைப்புகளும் தடை செய்யப்பட்ட அமைப்புகளாக அறிவிக்கப்பட்டுள்ளன.

பயங்கரவாத நடவடிக்கைகள் மற்றும் தேசிய பாதுகாப்புக்கு அச்சுறுத்தலாக இருக்கும் காரணத்தினாலேயே இந்த அமைப்புகள் மீது தடை விதிக்கப்பட்டுள்ளதாக பாதுகாப்பு அமைச்சின் வர்த்தமானி அறிவித்தல் விளக்குகிறது.