அமெரிக்காவுடன் இனி பேச்சுவார்த்தை இல்லை – ஈரான் திட்டவட்டமாக அறிவிப்பு

அமெரிக்காவுடன் எவ்வித பேச்சுவார்த்தையையும் முன்னெடுக்கும் எண்ணம் ஈரானுக்கு இல்லை என்று அந்த நாட்டு வெளியுறவுத்துறை அமைச்சின் செய்தித் தொடர்பாளர் திட்டவட்டமாக அறிவித்துள்ளார். அமெரிக்காவுடன் பேச்சுவார்த்தை நடத்துவதற்கான கோரிக்கையை ஈரான் முன்வைக்கவே இல்லை என்பதை அவர் தெளிவுபடுத்தியுள்ளார்.

ஏற்கனவே எட்டப்பட்ட ஒப்பந்தங்களின் விதிகள் மிகவும் மந்தகதியிலேயே நடைமுறைப்படுத்தப்பட்டு வருவதை ஈரான் தனது முக்கிய ஆட்சேபனையாகச் சுட்டிக்காட்டியுள்ளது. குறிப்பாக, ஈரானிய மசகு எண்ணெய் ஏற்றுமதி மீது விதிக்கப்பட்டுள்ள அமெரிக்கத் தடைகளை நீக்குவது தொடர்பான ‘பிரிவு 10’ (Article 10) முறையாகச் செயல்படுத்தப்படவில்லை என்பதில் ஈரான் கடும் அதிருப்தியடைந்துள்ளது.

இத்தகைய தற்போதைய பிராந்தியச் சூழலில் அமெரிக்காவுடன் எவ்விதமான இறுதிப் பேச்சுவார்த்தைகளையும் நடத்துவதை விட, முக்கியத்துவம் வாய்ந்த ஹோர்முஸ் நீரிணை விவகாரங்கள் குறித்து கட்டார் மற்றும் பாகிஸ்தான் ஆகிய நாடுகளுடன் இருதரப்பு கலந்துரையாடல்களை மேற்கொள்வதற்கே ஈரான் தற்பொழுது முன்னுரிமை அளித்து வருவதாகவும் தெரிவிக்கப்பட்டுள்ளது.