வகுப்பறைகளில் டேப்லெட் மற்றும் கணினி உள்ளிட்ட டிஜிட்டல் திரைகளின் அதிகப்படியான பயன்பாட்டால் மாணவர்களுக்கு ஏற்படும் உடல்நலக் பாதிப்புகள் மற்றும் கவனச்சிதறலைத் தடுக்க, ஸ்வீடன் அரசு மீண்டும் அச்சிடப்பட்ட பாடப்புத்தகங்களை வழங்கும் திட்டத்தை அமல்படுத்தியுள்ளது.
டிஜிட்டல் சாதனங்கள் மூலம் கல்வி கற்பதால் மாணவர்களின் வாசிப்புத் திறனும், நினைவாற்றலும் பெருமளவு சரிந்துள்ளதாகக் கரோலின்ஸ்கா மருத்துவப் பல்கலைக்கழகம் மற்றும் சர்வதேச ஆய்வுகள் எச்சரித்தன. இதனைத் தொடர்ந்து, ஸ்வீடன் பள்ளிக் கல்வி அமைச்சர் லோட்டா எட்ஹோம், 6 வயதுக்குட்பட்ட குழந்தைகளுக்கு டிஜிட்டல் திரைகளை முற்றிலுமாக ரத்து செய்து உத்தரவிட்டுள்ளார்.
மேலும், “ஒரு மாணவருக்கு ஒவ்வொரு பாடத்திற்கும் ஒரு அச்சிடப்பட்ட புத்தகம்” வழங்குவதை உறுதி செய்யப் பல நூறு மில்லியன் குரோனர் நிதியை அரசு ஒதுக்கியுள்ளது. நவீன தொழில்நுட்பத்தை விட, காகிதப் புத்தகங்களை வாசிப்பதும் பேனாவால் எழுதிப் பழகுவதுமே மாணவர்களின் மூளை வளர்ச்சிக்கும் ஆழமான கற்றலுக்கும் சிறந்தது எனக் கூறி ஸ்வீடன் எடுத்துள்ள இந்த முடிவு உலக நாடுகளின் கவனத்தை ஈர்த்துள்ளது.